Inductor

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Un inductor ye un component electronico pasivo d'os circuitos electricos que, debito a lo fenomeno de l'autoinducción, almadacena enerchía en forma de campo magnetico creyato por o paso d'a corrient electrica. Iste component tamién gosa decir-se bobina u inductancia. A capacidat d'un inductor d'almadacenar enerchía se mide por a suya inductancia que s'exprisa en henrys (simbolizato por H), una unidat derivata d'o Sistema Internacional d'unidaz.

En a teoría de circuitos un inductor ideyal tenerba inductancia pero no pas resistencia ni tampoco no capacitancia, por ixo no disiparba enerchía. En iste component ideyal tota la enerchía electrica absorbita sería almadacenata en forma de campo magnetico. Pero os inductors reals, que son fabricatos con un arrulamiento de filo conductor, son equivalents a una combinación d'inductancia, bella resistencia debita a la resistividat d'o filo, y bella capacitancia. En bella frecuencia, un inductor real se comporta como un circuito resonant debito a la capacitancia parasita. A mas de disipar enerchía por a resistencia electrica d'o filo conductor, o nuclio d'os inductors tamién la pueden disipar debito a la histeresi y con grans corrients tamién se pueden producir perdas d'enerchía a causa d'a no linialidat d'os circuitos.